Òganizasyon Panameriken/Òganizasyon Mondyal Lasante (OPS/OMS) nan yon rapò ki pibliye ayè mèkredi premye mas 2023 a fè konnen, depi lè maladi kolera tounen an Ayiti a, nan mwa oktòb 2022 a, gentan gen 594 moun ki mouri akoz maladi sila a.
Daprè rapò OPS, Ayiti anrejistre yon total de 33,185 ka sispèk nan 10 depatman jewografik nan peyi a ak 2,398 ka konfime, ki reprezante yon ogmantasyon de 5% nan sispèk yo ak 3% nan ka konfime nan 7 dènye jou yo.
Nan total ka konfime yo, 57% se gason ak 50% gen 19 lane oswa pi piti, ak gwoup laj ki pi afekte yo se timoun ki gen ant youn ak 4 lane, ki reprezante 20% nan total la, ki te swiv pa minè ant senk ak nèf lane ak 16%, pandan gen 14% nan moun ki enfekte ant 20 ak 29 lane.
Sepandan, Depatman Lwès la toujou rete Depatman ki gen pi gwo kantite ka yo, ak 54% nan tout kasispèk yo, alòske minisipalite Site Solèy ak Kafou nan Pòtoprens konsantre 62% nan ka sispèk yo.
N ap raple, prèske 1.2 milyon vaksen oral kont kolera te rive 12 desanm 2022 a sou teritwa ayisyen an. Premye faz kanpay vaksinasyon an, ki te kòmanse 19 desanm 2022 a nan minisipalite ki te pi afekte yo ak zòn ki antoure yo nan depatman Lwès ak Sant, te fini nan dat ki te lendi 16 janvye 2023 a.