Se konfime, Christian Atsu pèdi lavi l nan tranblemanntè Tiki an

Aprè anviwon yon semèn ap chèche l, sekou yo finalman jwenn kò Christian Atsu san vi nan batiman sa l te twouve l lan ki plonje pandan tranblemanntè sa ki ravaje yon bon pati nan Sid peyi Tiki ak Lasiri.

Dènye espwa pou te rejwenn entènasyonal ganeyen an vivan aprè tranblemanntè an tonbe aprè yo fin dekouvri kadav li jodi samdi an anba dekonm nan yon apatman 12 etaj ki te plonje avèk anviwon 800 moun ki te abite ladan l.

Nan yon premye tan, anbasad Gana nan peyi Tiki ak federasyon ganeyèn foutbòl lan te fè kwè ansyen jwè Chelsea an te vivan malgre efondreman batiman sa kote l te ye an. Jodi samdi a, se ofisyèl, Christian Atsu mouri.

Entènasyonal ganeyen an ki t ap jwe nan Hatayspor nan peyi Tiki depi septanm 2022, pèdi lavi l a 31 an nan tranblemanntè sa ki ravaje Tiki ak Lasiri kote plis pase 40,000 moun pèdi lavi yo, daprè dènye bilan ki kominike sou trajedi sa.

Christian Atsu, pandan 12 lane ap jwe foutbòl pwofesyonèl li yo, te pote koulè plizyè klèb sou kontinan ewopeyen an pami yo Chelsea ak Everton. Li te egalman jwe pou seleksyon ganeyèn lan pandan 60 match kote l te enskri 10 gòl.