Sou kesyon yon jounalis aprè defèt yo nan Parc des Princes lan (0-1) fas Bayern Munich, Kylian Mbappé ki te demare sou ban ranplasan an fè konnen Paris Saint-Germain toujou rete favori nan uityèm final sa.
Atakan fransè a ki te fè yon bon rantre nan dezyèm mitan match la, pale san rezèv, kote l fè konprann ekip Paris Saint-Germain an gen ase mwayen pou al chache kalifikasyon an nan Allianz Arena a nan twa semèn ankò.
«Nou pèdi 1-0, pa gen gòl deyò ankò, si nou jwe foutbòl ofansif nou an e nou rive mete yo an difikilte epi fè yon gòl, se ap egalite », pawòl chanpyon dimond fransè a ki kontinye kwè nan yon kalifikasyon PSG.
Kylian Mbappé te egalman pwononse yon diskou nan vesyè Paris Saint-Germain an kote l t ap motive ekipye l yo ki ta dwe pare nan twa semèn ankò,8 mas, pou al chache kalifikasyon an nan vil Munich.
Yon uityèm definal ki rive nan yon moman kote Paris Saint-Germain twouve l nan gwo difikilte avèk 5 defèt sou 11 match jwe depi kòmansman ane a, prensipalman twa dènye sa yo li pèdi youn aprè lòt la, sa ki pa t janm rive depi 2011.
