Pòt Pawòl PNH la, Gary Desrosiers, ki t ap adrese l ak gran piblik la jodi mèkredi 31 me a, anonse gran bilan operasyon Tornade Lapolis la reyalize sòti 26 janvye pou rive 26 mai 2023.
Nan kad operasyon sila a, Lapolis la rive arete 2730 prezime bandi. Toujou daprè bilan an, ajan fòs lòd yo konfiske 70 zam, 2661 minisyon, 67 machin, 2 chaloup. Yo rive pran nan men prezime bandi yo 16 kilo marigwana, 9 kilo kokayin, 24 723 466 goud, 39 000 dola ameriken pandan tout elan operasyon Tornade la.
Pòt Pawòl la, Gary Desrosiers, pandan entèvansyon l yo, fè konnen gen plizyè manm aktif divès baz enfliyan, swa nan kapital la ak vil pwovens yo, ki figire nan lis arestasyon yo, tankou 400 Mawozo, Gran Grif, Gran Ravin, Vilaj De Dye (5 Segond), Kraze Baryè, Savyen, pou n site sa yo sèlman, pandan li anonse tou operasyon an ap rapouswiv nan plizyè lòt klan bandi nan sousi pou kintinye derasinen fwaye gang yo nan peyi a.
