«Leta pa gen machin», chofè transpò piblik yo fikse pwòp pri kous yo

Jacky Chery
Jacky Chery  - Rédacteur
«leta pa gen machin», chofè transpò piblik yo fikse pwòp pri kous yo
Jan sa konn abitye fèt, depi gen ajisteman nan pri pwodui nan ponp yo, Leta toujou aranje l pou fikse pri kous machin yo sou teritwa a. Depi kèk lane, konsta ki fèt yo montre sektè transpò a ap chape anba men Leta pou vin jounen jodia yon sektè liberal.
Sou dènye pase men ki fèt nan pri kous machin yo semèn sa aprè gouvènman an te fin monte pri pwodui petwolye yo, chofè yo nan divès kwen nan rejyon metwopolitèn lan ak nan vil pwovens yo pa deside aplike tarif Leta fikse yo. Pou anpil nan yo, Leta pa konnen reyalite transpò a nan peyi a.
Pandan fen semèn lan, nan yon kominike ki pibliye nan lannwit 16 pou rantre 17 novanm lan, Ministè afè sosyal ak travay fikse pri prèske tout kous machin sou teritwa nasyonal la. Yon desizyon ki pran aprè ajisteman pri pwodui petwolye yo nan ponp yo. Yon desizyon chofè machin transpò piblik yo pa deside aksepte.
Nan nouvo tarif gouvènman an fikse yo, globalman pri transpò k ap fèt ant komin yo nan rejyon metwopolitèn lan fikse a 55 goud, pou transpò entèdepatmantal yo, pri yo chita ant 500 jiska 2500 goud. Nan reyalite a se konplètman diferan. Chofè yo, nan anpil zòn, kenbe pri yo te fikse pandan gaz la t ap vann sou mache nwa pandan peryòd kriz la. Kous gouvènman an fikse 55 goud yo peye pou pi piti 75 goud nan pri chofè yo touche a.
Yon sitiyasyon ki pa sispann pwovoke gwo bouch louvri ant pasajè ak chofè machin. Si pou pasajè yo se feblès Leta ki lakoz manadjè ak chofè machin ap fikse pri yo vle nan transpò piblik la, chofè yo bò kote pa yo voye jete byen lwen nouvo pri gouvènman an fikse yo.
Chofè transpò piblik yo itilize kòm pretèks fenomèn enflasyon ki genyen nan peyi a pandan dènye ane yo e ki pa sispann ogmante. Pou yo menm, lavi chè a, monte dola ameriken, ak plizyè lòt faktè sosyoekonomik, se sa ki oblije yo fikse pri pa yo.
Yon sektè ki sanble fin liberalize nan peyi a kote depi kèk tan pri kous yo se chofè ak moun k ap chaje machin ki fikse yo. Yon sitiyasyon kote prensipal viktim lan se popilasyon an ki nan obligasyon itilize sèvis transpò piblik pou deplase.

Facebook Comments

- Advertisement -
Partagez cet article
Jacky Chery
Par Jacky Chery Rédacteur
Follow:
Étudiant en Communication Sociale et en Sciences Juridiques à l'UEH, également Journaliste-redacteur à Netalkole Media. Un passionné de l'écriture et de la lecture.