Caleb Webster Fénélon anpil moun konnen sou non Mr zomò ak pwodiksyon ” Gwolyon Empire”, anonse yon nouvo albòm ki pote non ” Tout se lòv volim 2 ” atravè yon videyo k ap sikile sou rezo sosyal yo ki dire 45 segond, k ap sòti nan dat 14 fevriye k ap vini la.
Anpil sipòtè gentan enpasyan, tèlman yo swaf pou y al nouri zòrèy yo ak nouvo albòm sila a, ki genyen ladann 10 mizik. Mr Zomò vle kontinye pote lajwa nan kè sipòte l yo. Se rezon sa ki fè l ap mache ak pwovizyon nan dyakout li nan yon dat ki trè espesyal, kote yo plis valorize moun ki anmoure yo.
” M santi m pa ka tann albòm nan ankò, tèlman anvi tandel anpil love pou ou Mr Zomò Gwolyon, m tèlman renmen tenb vokal ou anfen. Ou twò fò respè pou ou, N ap tann li ak tout fòs m santi pral gen bagay, se li n ap tann bon travay” reyaksyon plizyè sipòtè sou rezo sosyal yo.
Daprè deklasyon anpil nan yo, yo montre yo konprann travay atis la ap fè nan sosyete a, epi yo vle kore l san vire gade dèyè, nan lide pou l ka rive pi lwen nan endistri mizikal ansyen an. “Albòm nan ap disponib sou tout platfòm nimerik yo, nan entansyon pou ankouraje kreyativite epi pwodisyon atistik mizik ayisyen an”, daprè yon kominike ” Gwolyon Empire” te pibliye nan dat premye fevriye pase a.
N ap raple Mr Zomò apèn gen yon nouvo manager ki rele Jude Jean Pierre. Atis la vle make pasaj li nan endistri mizikal ayisyen an menm jan anpil lòt atis fè l deja, pami yo Mikaben ki rete yon modèl pou tout jèn ki vle entegre nan mizik an Ayiti, BIC, Bélo elatriye.