Pèsonalite ayisyen sa yo ki kite nou pandan ane 2022 an

Jacky Chery
Jacky Chery  - Rédacteur
netalkole pèsonalite ayisyen sa yo ki kite nou pandan ane 2022 an
Ane 2022 an ale, men trennen dèyè l yon seri pèsonalite an Ayiti ki te enplike nan yon fason oubyen yon lòt nan lavi sosyal, politik ak ekonomik anndan peyi an. Se moman pou n prezante kèk nan yo ki mouri anba maladi oubyen pèdi lavi yo akoz ensekirite pandan ane sa.
1- Jean Renol Elie
Doktè nan sosyoloji, Jean Renol Elie ki t ap anseye nan Fakilte Syanzimèn anndan Inivèsitè Leta a ta pral mouri nan dat 19 avril ane sa, lakay li, akoz yon ensifizans renal li t ap goumen kont li depi kèk tan. Ansyen Kwòdonatè jeneral nan Fakilte Syanzimèn, pwofesè an gen nan CV li de metriz ak yon doktora li te fè nan yon inivèsite nan peyi Meksik.
2- Yvon Buissereth
Ansyen senatè Repiblik, Direktè jeneral Antrepriz piblik pou pwomosyon lojman sosyal yo (EPPLS), Yvon Buissereth mouri asasinen nan Laboul 12 samdi 6 dawout 2022 an kote bandi ak zam ki okipe espas sa te menm rive boule kadav li.
3- Patchouko
Lesly Guillaume moun plis konnen nan endistri mizikal ayisyen an sou non Patchouko mouri nan dat 16 dawout 2022 an, nan peyi Etazini, aprè yon kriz kadyak daprè sa fanmi an te fè konnen sou sikonstans lanmò an. Ansyen chantè vedèt Digital Express la mouri, men kite kòm eritaj plizyè chante trè popilè tankou «Plezi vakans», « Week-end digital », « Se ou », ak plizyè lòt ankò.
4- Fanmi Desanclos yo
Josette fils Desanclos, Sarahdjie ak Sherwood Sondjie Desanclos, twa manm yon sèl fanmi ki te mouri asasinen nan Kwadèboukè nan dat 20 dawout 2022 an kote, menm jan ak ansyen senatè Yvon Buissereth, bandi yo ki te fè zak sa te mete dife sou yo. Josette ki se manman an te yon anplwaye APN, Sarahdjie t ap etidye nan yon inivèsite nan kapital la ak Sherwood ki se te yon ansyen etidyant Fakilte dwa ak syans ekonomik (FDSE).
5- Mikaben
Lanmò ki fè plis bri pandan ane an. Michael Benjamin moun plis konnen sou non Mikaben mouri nan dat 15 oktòb 2022 an nan okazyon konsè retwouvay gwoup mizikal Carimi t ap òganize nan Accor Arena ki twouve l nan vil Paris. Chantè, pwodiktè, aktè, Mikaben ki te gen 41 lane mouri aprè yon arè kadyak sou sèn lan, touswit aprè pèfòmans li an.
6- Komisè Bact Angelot
Komisè Bact Angelot ki te nan tèt komisarya Kwadèboukè an mouri nan dat 18 oktòb pase an, devan lakay li nan Taba, aprè yon atak nèg ak zam. Enfòmasyon yo te fè konnen komisè an mouri aprè yon bouch louvri ak de endividi ki t ap obsève kay kote l rete an.
7- Tess Gary
Jounalis Tess Gary ki te animatè yon emisyon gran ekout nan radyo Lebon FM nan Okay ta pral disparèt nan dat 18 oktòb pase a, nan demen yon gwo manifestasyon ki te òganize nan vil la. Anviwon yon semèn aprè, fanmi an ta pral dekouvri kadav jounalis lan ki te kòmanse dekonpoze.
8- Éric Jean Baptiste
Yon nouvèl ki te siprann anpil moun nan sosyete an. Sekretè jeneral RDNP an mouri asasinen vandredi 28 oktòb pase an pandan l te sou wout pou rantre lakay li nan Taraz. Éric Jean Baptiste ki te gen 52 lane pèdi lavi l ak tout yon sekirite l nan yon atak endividi ak zam nan Laboul te fè sou li malgre jefò ki te fèt pou kouri transpòte l lopital.
9- Romelson Vilcin
Yon lòt kou di pou sektè laprès la pandan ane 2022 an. Jounalis Romelson Vilcin ki t ap kolabore ak medya Jim Studio, Zenyèz TV ak Radyo Génération 80, mouri sou lakou komisarya Dèlma 33 a aprè li te fin resevwa kout yon bonbòn gaz lakrimojèn nan tèt. Jounalis la ki te la non sèlman pou fè travay li, te vini egalman pou pote sipò l ak yon lòt konfrè ki te fèmen nan komisarya a.
10- Nadine Pierre
Yon non moun ki te konn swiv sinema ayisyen an nan kòmansman ane 2000 yo konnen byen. Nadine Pierre mouri nan dat 4 desanm 2022 an, nan peyi Etazini, akoz yon kansè li t ap goumen avè depi kèk ane. Aktris la ki te gen 39 lane, te jwe nan plizyè fim ki te fè gwo siksè nan sinema ayisyen an tankou « Le choix de ma vie », « L’amour de Suzie », « Ala traka pou Baba », pou n site sa yo sèlman.
11- Odette Roy Fombrun
Dwayèn nou an, Odette Roy Fombrun ki te gen 105 lane, mouri 23 desanm ki sot pase a lakay li. Daprè pitit fi li Marie Claude Bayard, se yon lanmò ki te vini trankilman pou istoryèn lan. Fineray Odette Roy Fombrun chante madi 27 desanm 2022 an nan legliz Senpyè kote anpil gwo pèsonalite nan peyi an te al rann li yon dènye omaj.
12- Moun ki pa gen non yo
Se prèske chak jou moun ap mouri anndan peyi an, sitou avèk fenomèn ensekirite an ki pa sispann vale tèren chak jou pi plis. Pou sèlman ane 2022 an, Nasyonzini resanse plis pase 1 400 sitwayen ayisyen ki pèdi lavi yo an Ayiti akoz vyolans k ap layite kò l nan tout kwen nan peyi an. Moun sa yo ki pa fè gwo tit nan medya pandan ane an, kite anpil lapèn ak chagren nan chak fanmi sa yo.

Facebook Comments

- Advertisement -
Partagez cet article
Jacky Chery
Par Jacky Chery Rédacteur
Follow:
Étudiant en Communication Sociale et en Sciences Juridiques à l'UEH, également Journaliste-redacteur à Netalkole Media. Un passionné de l'écriture et de la lecture.