Ayè lendi 24 Oktòb la nan aprèmidi, plizyè dizèn manifestan te pran lari pou te rele chalbare dèyè pouvwa anplas la ki gen nan tèt li Ariel Henry. Se te okazyon pou yo te rive devan anbasad Kanada ki sou Delma, ant Delma 75 ak 71, pou te denonse enplikasyon l nan mizè peyi a.
Konsa, pwotestatè yo pat pran tan pou te mete kawoutchou devan baryè santral lokal ki abrite anbasad sila, epi mete dife. Ak anpil kòlè, yo te kritike gouvènman kanadyen an, ki gen nan tèt li Premye minis Justin Trudeau, ki pa yon alye peyi d Ayiti reyèlman epi k ap sipòte yon rejim ki pa lejitim pa bò isit.
Lapolis ki te sou plas te repran kontwòl sitiyasyon an anba gwo difikilte. Responsab mobilizasyon sila yo te mande pou Kanada « kite tè peyi d Ayiti, yo pa byenvini ankò ». San konte yo t ap flote byen wo drapo peyi Larisi, ak mande l yon kout men nan kriz aktyèl la. Yon sèn ki te deja dewoule devan lokal anbasad Lèzetazini an an Ayiti ki nan komin Taba.
Devan anbasad amerikèn ki nan Taba 41, komin Taba, plizyè nan pwotestatè yo te afiche yo semèn pase a avèk drapo Larisi a nan men yo epi te mande pou gouvènman ris la ede yo rezoud kriz la pa bò isit an Ayiti, pandan yo t ap mande pou Lèzetazini kite peyi a.
« Anbasad amerikèn, kite peyi a pou nou […]. Pèp ayisyen, poukisa polisye yo ap sekirize yon anbasad ki pa itil nou yon mèd. Pèp ayisyen poukisa Lèzetazini ap fè nou pase mizè sa yo. Pèp ayisyen poukisa lè yon prezidan eli pou pèp la, Lèzetazini bal koudeta”, se kèk pami divès deklarasyon youn nan manifestasyon yo te lanse aprè peripesi yo te pase pou rive rantre devan anbasad Lèzetazini an an Ayiti.
Si nan yon premye tan manifestan yo te konn pran lari pou rele chalbare dèyè pouvwa anplas la, kidonk rejim Tèt Kale a ki gen nan tèt li Ariel Henry, ak Lèzetazini ak Kanada k ap sipòte l, pou kounya, anplis de sa, yo mande pou Larisi pote yo sekou fas ak sitiyasyon malouk teritwa a ap fè fas depi kèk tan.
