Plis pase 5 000 migran ayisyen ki nan gwo difikilte nan peyi Tiki kontinye ap mande entèvansyon Leta ayisyen pou fasilite yo retounen lakay yo daprè Fondasyon Lorquet ki lanse yon S.O.S ak otorite yo ayè lendi 6 fevriye a.
Ayisyen sa yo, pou anpil nan yo, ki te kite Ayiti pou al chache yon lavi miyò, retwouve yo nan gwo difikilte sou teritwa Tiki an san papye legal peyi an, sa ki oblije yo kontinye ap viv nan kache. Konpatriyòt sa yo kontinye ap mande otorite ayisyen yo fasilite yo retounen lakay yo.
Pou pi piti 5 000 ayisyen san papye sou teritwa Tik la k ap fè fas ak tout kalite difikilte kote yo pa menm gen lajan pou ta peye yon biyè avyon pou retounen Ayiti, oblije rete nan peyi a malgre sitiyasyon yo nan moman fredi sa sou kontinan ewopeyen an, daprè Fondasyon Lorquet.
Fondasyon an, fas ak sitiyasyon ayisyen sa yo nan peyi Tiki an, di li espere responsab yo an Ayiti ap pran an konsiderasyon imedyatman S.O.S sa pou fasilite konpatriyòt sa yo retounen nan peyi a pou vin kontinye viv lakay yo.
N ap raple, nan mwa jiyè 2022, genyen yon gwoup anviwon 300 ayisyen ki te deja retounen nan peyi an akoz menm sitiyasyon sa yo gras ak akonpayman Òganizasyon entènasyonal migrasyon, Ofis pwoteksyon sitwayen, Ministè ayisyen afè etranje, ansanm ak divès lòt patnè.
