Mèkato ivènal la fini an Ewòp 31 janvye sa. Pandan plizyè klèb te aktif pou yo te ranfòse effectif yo, genyen ki pa t bouje pou yo pran menm yon grenn jwè. Pami ekip sa n ap jwenn 5 kadò nan foutbòl Ewopeyen an.
Mache transfè a se yon ranfò epi yon opòtinite pou klèb yo travay sou feblès yo genyen nan kèk pòs pandan y ap achte lòt eleman mete nan efektif yo. Pou mèkato ivènal la, gen 5 klèb Ewopeyen ki pa t entèrese ak sa nou rele ranfòsman an.
Aprè gwo mèkato estival li te fè a kote l te pran nenpòt 6 jwè, FC Barcelone rete bèbè pou mèkato sa. Nan dènye enstan yo, jounal yo t ap pale sou enterè klèb Katalan an gen pou Sofyan Amrabat, men transfè sa pa rive boukle.
Tankou rival li, Real Madrid li menm tou pa achte okenn jwè nan mèkato sa. Chanpyon Ewòp an tit la pare pou l afwonte rès sezon an ak zam li genyen yo. Inter Milan ki apenn sot pran Sipèkoup Itali a pa mete nouvo eleman nan efektif li tou.
Malgre sezon difisil l ap fè a, Juventus ale nan menm sans ak klèb nou sot site la yo. Tirinwa yo elimine nan « Champions League » epi yo pèdi yon pakèt pwen nan chanpyona a pou kesyon fwod. Rezilta yo pa fin bon dènye tan sa yo tou.
Yon klèb tankou Paris Saint-Germain pa pran pyès moun. Klèb Fransè a ki reve pran Champions League lan pa t twò aktif sou mache transfè a. Yo te vize Skriniar, sa pa t boukle. Men fòk nou raple yo te fè yon gwo mèkato ete pase a.
