Nan match zanmitay ki jwe jodi samdi premye jiyè an nan peyi Laswis, seleksyon nasyonal ayisyèn bò kote medam yo kraze malt 5-0 pou mete fen ak premye pati preparasyon yo an.
Grenadye yo ki t ap jwe kont medam Malt yo nan kad preparasyon pou pwochen mondyal fanm lan, fè yon kokennchenn viktwa 5 gòl a zewo avèk 4 ki te gentan fèt depi nan premye mitan an.
Gras avèk Nérilia Mondésir, Kethna Louis, Roselord Borgella, Batcheba Louis epi Shwendesky Joseph, seleksyon ayisyèn lan laminen ekip Malt lan.
Seleksyon nasyonal ayisyèn lan ki te tabli baz li nan peyi Laswis depi anviwon semèn, ta dwe kite kontinan ewopeyen an demen dimanch 2 jiyè an pou rann li nan peyi Kore Disid pou dezyèm pati preparasyon an.
