Konsèy Nasyonal Sosyete Sivil Ayisyen (CNSCA) nan yon nòt li pibliye Mèkredi 28 septanm 2022 a, di li denonse mepri gouvènman an devan revandikasyon pèp Ayisyen an. Pandan l ap pataje kòlè popilasyon an, CNSCA mande gouvènman an pou l debloke Tèminal Vare pi vit posib.
Nan nòt li a, CNSCA di li obsève ak pi gwo lapenn sitiyasyon almant peyi a plonje depi kèk lane a ki kontinye ap deteryore pi plis chak jou. Li fè konnen tou sitiyasyon sekirite a, ak kriz gaz la pandan plizyè mwa ak rèl popilasyon otorite yo pa janm tande a te mennen nan blokaj total aktivite yo pou twa semèn ki sot pase yo.
Konsèy Nasyonal Sosyete Nasyonal Sivil Ayiti (CNSCA) te di tou Entèvansyon ki plen manti sou sitiyasyon peyi a Mesye Jean Victor Généus, pandan 77èm sesyon òdinè Asanble Jeneral Nasyonzini samdi 24 septanm nan, se sentòm deperi lidèchip ak bon gouvènans nan peyi a.
Se sak fè , estrikti sosyete sivil sa a di li kwè Ayiti pa bezwen mantè, lach, ki pou reprezante l nan fowòm k ap fèt devan lemonn antye.
Yon lòt bò Estrikti a di li konprann epi li pataje kòlè popilasyon an aprè desizyon gouvènman Ariel Henry a te pran pou ogmante pri gaz yo nan peyi a, nan sans sa CNSCA mande gouvènman an pou l montre entèlijans estratejik nan sitiyasyon sa a e pou l pran dispozisyon ki nesesè pou fasilite rekòmansman aktivite yo nan peyi a.
