Nan yon korespondans ki adrese ak komite nòmalizasyon FHF la, pi wo enstans k ap dirije foutbòl mondyal la (FIFA) reponn Doktè Yves Jean-Bart ki te anonse nan yon konferans pou Laprès retou li nan tèt Federasyon an.
Avèk desizyon Tribinal abitral espò (TAS) te pran nan fen mwa fevriye ki sot pase an pou anile divès sanksyon ki te pran kont Doktè Yves Jean-Bart yo, FIFA pa deside aksepte rekèt avoka Dadou yo ki te anonse retou li nan tèt Federasyon an.
Nan korespondans sa ki pote dat 15 mas 2023, Federasyon entènasyonal foutbòl la voye yon pinga bay dirijan komite nòmalizasyon FHF yo pou pran tout dispozisyon pou pa kite Yves Jean-Bart abouti ak volonte li genyen pou repran tèt Federasyon an.
FIFA raple komite sa ki nan tèt FHF la sanksyon ki kapab pran kont Federasyon ayisyèn foutbòl la nan ka yo ta kite Dadou repran kontwòl Federasyon an jan li te anonse l ap gen pou fè sa nan pa twò lontan.
N ap raple, avèk piblikasyon atik jounalis Romain Molina a nan jounal britanik the Guardian ki te denonse Yves Jean-Bart ak plizyè lòt dirijan foutbòl ayisyen an pou kesyon abi seksyèl sou jèn tifi, FIFA ta pral pran sanksyon kont ansyen prezidan FHF la ki pa t gen dwa patisipe nan okenn aktivite espò jiskaske l mouri.
Malgre desizyon TAS yo, Federasyon entènasyonal foutbòl la (FIFA) kanpe dèyè sanksyon li te pran nan mwa oktòb 2020 kont Dadou yo ki te gen pou peye jiska yon milyon dola kòm amann akote mezi pou entèdi l patisipe nan aktivite foutbòl jiskaske l mouri an.
