Rektora Inivèsite Leta Dayiti a, nan yon nòt li pibliye ak gran piblik la ayè madi 31 janvye a, denonse zak kidnapin ki fèt sou yon manm pèsonèl li ki se Mesye Jean Renel Lajoie, k ap travay kòm chofè nan fakilte Dwa ak Syans Ekonomik lan (FDSE).
Inivèsite Leta fè konnen, nan jou ki te vandredi 27 janvye 2023 a, plizyè vakabon pote ale Mesye Lajoie alòske l te abò yon machin antite a, yon pikòp koulè blanch ki imatrikile SE-02469. Enfòmasyon yo revele kidnapè yo pran l ak tout machin nan.
Inite kominikasyon UEH la denonse epi kondane anlèvman chofè li a, li prezante l kòm yon manm kominote inivèsite a. Li mande yon lòt kote liberasyon Mesye Lajoie prese prese, san pyès kondisyon.
“Le Rectorat de l’Université d’Etat d’Haiti dénonce et condamne de manière vëhémente ce kidnapping à l’encontre d’un membre de la communauté universitaire. Il réclame par ailleurs la libération immédiate et sans condition de Monsicur LAJOIE ainsi que la voiture séquestrée” : Rektora Inivèsite Leta Dayiti a, nan nòt sila ki fèt Pòtoprens epi ki pote dat 31 janvye 2023.
Yon lòt kote, responsab inivèsite yo di yo pote tout soutyen yo ak fanmi epi pwòch viktim nan, ak tout kominote inivèsitè a, patikilyèman ak kominote Fakilte Dwa ak Syans Ekonomik lan – pandan y ap tann Misye Jean Renel Lajoie tounen jwenn yo ak enpasyans.
Rektora UEH la pwofite lanse yon alèt bay otorite konsène yo pou yo pran tout mezi posib pou frennen ensekirite a, patikilyèman kidnapin nan sou teritwa a ki atenn dènye nivo l. Yo menm deklare sosyete ayisyèn nan fatige viv konsa.
N ap raple, depi kòmansman mwa janvye a, ka kidnapin ak asasina yo te kòmanse panpannen kò yo sou teritwa a[…]Depi semèn ki sot pase a, patikilyèman depi aprè asasina plis pase yon kenzèn polisye anba men bandi nan kapital Pòtoprens lan ak vil pwovens yo, zak malonèt yo pa sispann miltipliye. Plizyè ka kidnapin oubyen asasina resanse, tout sa nan pi gwo silans otorite yo. Lapolis paka fè anyen paske menm li menm li chita sou ban viktim yo.
