Kontrebann se yon gwo pwoblèm an Ayiti, ki afekte ekonomi ak sekirite nasyonal la. Kontrebann enplike transpò ilegal machandiz oswa byen atravè fwontyè yo san yo pa pase nan kanal ofisyèl yo, tankou dwànn ak taks.
An Ayiti, kontrebann se yon sous revni enpòtan pou kontrebandye yo, men li andomaje ekonomi Ayisyèn nan, nan ankouraje konpetisyon enjis, febli koleksyon taks ak dekouraje envestisman etranje. Kontrebann afekte sekirite nasyonal la tou nan entwodwi zam ilegal ak fasilite trafik dwòg anndan sosyete Ayisyèn nan.
Se sak fè, pou anpil ekonomis tankou Riphart Serent, pou rezoud pwoblèm sa, Gouvènman ayisyen an ta dwe pran dispozisyon pou konbat kontrebann, tankou ranfòsman kontwòl fwontyè yo epi ogmante sanksyon pou kontrebann yo. Sepandan, mank de resous ak pèsonèl ak koripsyon toupatou fè li difisil pou konbat fenomèn sa a.
Nan sans sa, ekonomis yo fè konnen gen yon nesesite pou ranfòse koperasyon entènasyonal la pou konbat kontrebann ak envesti nan enfrastrikti tankou pò modèn ak ayewopò pou fasilite komès legal ak reglemante. Anplis de sa, pou ekonomis sa yo, pi bon fòmasyon ak konpansasyon adekwa pou fòs sekirite yo ta ka ede tou diminye koripsyon ak ranfòse kapasite leta pou konbat kontrebann.
Facebook Comments