Nan yon kominike pou laprès ki pote dat 9 fevriye 2023, Ministè edikasyon nasyonal kondane atak sa nèg ak zam fè sou yon lekòl nan komin Lyankou ki lakoz yon elèv 10 lane pèdi lavi l pandan l te nan klas.
Alfred Fekens, yon elèv katriyèm ane fondamantal, pèdi lavi l madi ki sot pase a aprè l te fin resevwa yon bal pandan l te nan klas nan yon atak nèg ak zam sou yon lekòl nan lokalite Lyankou daprè enfòmasyon MENFP rann piblik.
Daprè nòt sa Ministè a mete deyò ayè jedi 9 fevriye a, ti lèzany 10 lane sa ki te resevwa yon bal pandan l te nan sal klas li, pèdi lavi l malerezman malgre tout jefò ki te fèt pou transpòte l lopital.
Ministè a ki di li kondane ak tout fòs li zak briganday ak atak sou lekòl ki fèt nan komin Lyankou an, raple « tout timoun gen dwa pou ale lekòl, aprann san kè sote e jwenn pwoteksyon tout sosyete a nan kèlkeswa sikonstans lan».
« Ministè a kondane zak sa a ki revòlte konsyans tout kominote edikatif la e renouvle apèl li bay tout sosyete a pou pwoteje lekòl, timoun yo, ak pèsonèl edikatif la», sa nou kapab li nan nòt sa ki pibliye sou diferan kont MENFP sou rezo sosyal yo.
Facebook Comments