MTVAyiti di konpòtman Leta ayisyen fas ak ensekirite a preyokipe l anpil

Pooshy Rosana
Pooshy Rosana  - Rédacteur
mtvayiti di konpòtman leta ayisyen fas ak ensekirite a preyokipe l anpil
Mouvman Twazyèm Vwa Ayiti (MTVAyiti) pwononse l sou zafè ensekirite a k ap vale teren nan peyi d Ayiti, kote bandi ap simaye dèy ak latwoublay prèske tout kote sou teritwa a.
Depi kèk tan ensekirite a ap panpannen kò l nan peyi a, bandi ak zam kou ak manchèt ap wete lavi moun oubyen kidnape yo ak vòlè sa yo genyen anba je otorite ki konsène yo. Poutèt rezon sila pati politik la mande otorite yo ki nan tèt peyi d Ayiti pou pran responsabilite yo.
MTVAyiti pran kòm ekzanp plizyè komin sou teritwa kote sitiyasyon an dejenere, tankou nan Tirivyè Latibonit, Kabarè, Akayè, Kanaran, elatriye. Popilasyon k ap viv la yo ap sibi gwo presyon anba men gang.
Pati politik la fè konnen sitiyasyon sila lakòz anpil moun blije kite kay yo pou al refijye yo lòt kote, san konte fòs sekirite yo ki sou teritwa pèdi kontwòl sitiyasyon an.
Yon lòt kote Mouvman Twazyèm Vwa Ayiti te tou pwofite kondane move tretman Ayisyen yo ki an Repiblik dominikèn ap sibi anba men ajan imigrasyon yo, sa ki vyole totalman, daprè li menm, Pwotokòl Akò sou Pwosedi Rapatriman ki te siyen 2 desanm 1999 anba kout plim anbasadè ayisyen Guy Lamothe ak Wenceslas Guerrero, Repiblik dominikèn, nan kad komisyon miks ant 2 peyi yo.
Ni Ayiti ni Repiblik dominikèn pa respekte sa akò a te di, daprè MTVAyiti nan yon kominike.
Pandan l ap defann yon ko-abitasyon nan tèt kole ant 2 pèp yo ki pataje menm zile, MTVAyiti mande pou gouvènman ayisyen an sòti nan silans li epi pou l entèvni atravè kanal diplomatik li yo pou jwenn yon solisyon efikas ak dirab nan sitiyasyon sa a paske konsekans sa a se yon dezas pou frè ak sè nou yo ki pèsekite akòz orijin etnik yo.

Facebook Comments

- Advertisement -
Partagez cet article
Pooshy Rosana
Par Pooshy Rosana Rédacteur
Follow:
Pooshy Rosana, journaliste-rédacteur à Netalkolemedia, caricaturiste et graphiste. Parallèlement, coach fitness. Adore la culture populaire, les documentaires et la musculation.