Prezidan ameriken an, Joe Biden, nonmen Dennis B. Hankins pou vini nouvo anbasadè Etazini an Ayiti. Anbasadè a ki gen yon long eksperyans nan diplomasi ameriken an, ap tann palman an konfime nouvo pòs li an.
Dennis B. Hankins ki gen prèske 40 lane depi l ap sèvi peyi Etazini nan misyon deyò yo, jwenn benediksyon Chèf Leta ameriken an, Joe Biden, ki chwazi l pou vini defann enterè Etazini sou teritwa ayisyen an.
Diplomat 64 lane a ki te okipe fonksyon anbasadè nan peyi Gine ak Mali tou dènyeman, pral gen pou ranplase Michele Sison ki te kite pòs li nan mwa oktòb 2021 aprè twa lane li te pase ap dirije anbasad Etazini an sou bout tè papa Desalin lan.
Dennis B. Hankins k ap travay jiskaprezan kòm konseye nan zafè politik etranje nan Biwo Gad nasyonal Pentagòn lan, genyen yon gwo karyè nan zafè politik etranje pou Etazini. Pandan twa fwa, li te chèf misyon sou kontinan afriken an nan peyi Soudan, Moritani ak Mozanmbik.
N ap raple, anbasad Etazini an Ayiti an gen Chaje dafè Eric Stromayer k ap dirije l depi aprè demisyon Daniel Foote lan ki pa t dakò ak politik administrasyon Biden lan ap mennen nan peyi a, san konte tretman migran Ayisyen yo pa sispann resevwa sou fwontyè ameriken an.
