Ayè madi 8 novanm 2022 a, Elisma Maxo, ki se yon ajan kanbiz k ap chanje lajan ameriken, tonbe anba bal bandi san fwa ni lwa k ap simen dèy andedan kominote ayisyèn nan, presizeman nan komin Leyogàn. Viktim nan resevwa 10 bal nan men malfra san ginen yo pandan l t ap flannen sou yon motosiklèt nan komin nan.
Elisma Maxo se non sitwayen sa a k ap chanje lajan ameriken, yon biznis moun plis konnen sou non kanbiz nan peyi Dayiti. Byen ta nan Aprè midi madi 8 novanm lan, atoufè moun pa t rive idantifye louvri kout bal sou li, viktim lan pèdi lavi l nan komin Leyogàn. Daprè enfòmasyon Radyo ak Televizyon Inédit rapòte.
Nap soulinye depi plizyè lanne, zak sasinay yo pa sispann kontinye fè chimen yo nan tout rakwen peyi a. Se bandi ak gwo zam lou k ap opere anba bab otorite Leta yo, se yo ki fè lalwa. Pandan dispozisyon ap pran pou louvri lekòl, mete presyon pou tout bagay fonskyone pou lajan ka rantre, okenn pa poko fèt pou rezoud van ensekirite a ak zak kidnapin nan ki se yon defi total pou gouvènman aktyèl la.
