Peyi Gana pèdi youn nan zetwal TikTok li yo, Ahoufe moun plis konnen sou non Tupac ganeyen an, nan referans ak zidòl li rapè Tupac Shakur.
Ahoufe rann dènye souf li ayè jedi a aprè l te pase kèk tan ap goumen anba yon maladi. Toutfwa yon lòt kote plizyè sous enfòme li ta mouri akòz yon ovèdòz. E jiskaprezan manm fanmi Ahoufe yo poko janm pwononse yo sou nouvèl la pou bay veritab rezon lanmò sila.
Sou rezo sosyal yo, fanatik Tupac ganeyen an eksprime tristès yo fas ak pèt sila. Yo pibliye mesaj kòdoleyans ak fanmi li epi pataje videyo li nan souvni bon tan yo lè l te vivan.
N ap raple Ahoufe te rive popilè sou rezo sosyal yo, patikilyèman TikTok, pou fizik li ak karaktè ti komik li pataje nan videyo li yo. Avèk plis pase 4 milyon abone sou TikTok, li pa t pran tan pou l tounen yon fenomèm nan peyi Gana ak nan rès mond lan tou, avèk yon kantite fanatik ki te konn swiv chak piblikasyon l yo san rate youn.
