Ouvriye yo nan faktori SONAPI tanmen jodi lendi 8 me 2023 a yon jounen manifestasyon nan lide pou egzije responsab yo peye yo pou pi piti 2,500 goud kòm salè minimòm.
Bandwòl epi fèy bwa nan men yo, yon kantite anplwaye faktori SONAPI manifeste jodi lendi an pou egzije pou pi piti 2,500 goud jounen travay. Anplwaye yo ki pa travay 7 jou sou 7 ankò men pito 4 jou pa semèn (lendi jiska jedi) depi aprè konjonkti malatchyong lan, touche yon montan 685 goud chak jou kòm salè minimòm.
Yon mouvman ki te kòmanse pasifikman byen bonè jodi lendi an, avan polisye ki te sou plas yo ta pral kraze l a plizyè repriz avèk gaz lakrimojèn. Yon reyaksyon ki ta pral leve plim sou do manifestan yo.
Pou moman n ap ekri atik la (11è AM) pwotestatè yo toujou nan lari a, espesyalman sou wout Dèlma a, avèk pou prensipal destinasyon devan rezidans Premye minis lan nan Miso, pou egzije responsab yo nan SONAPI ak Leta ayisyen tande kri yo.
Facebook Comments