Lapolis nan peyi Lèzetazini anonse ayè mèkredi 28 septanm 2022 a 23 moun disparèt abò yon bato nan lanmè, tou pre Eta Florid. Tout se migran Kiben yo ye daprè sa otorite yo enfòme.
Yon lòt kote, gad kot amerikèn yo rapòte genyen 4 nan yo ki rive sòti vivan aprè tanpèt la te fin chavire bato ki t ap transpòte yo a. Se naje yo naje pou yo te kapab rive jwenn tè.
Ajan patwouy ki sou fwontyè Lèzetazini an, nan zòn Stock Island, nan Florid, fè konnen sou Twitter plizyè migran te rive sou rivaj yo aprè tanpèt te koule bato yo.
Nan yon tweet, Walter Slosar deklare : “Ofisye yo te deplwaye aprè plizyè imigran te naje pou rive atè nan Stock Island, Monroe, Florid.”
N ap raple, Ian, yon siklòn Kategori 4 ak gwo van ki te kontinye rive jiska 250 km/lè, te tonbe sou kòt lwès Florid nan Mèkredi aprèmidi. Li deja fè anpil dega sou teritwa ameriken an.
Facebook Comments