Premye Minis Ariel Henry nan yon diskou bay nasyon an dimanch 18 septanm sa a, mande popilasyon an ki te pran lari depi plizyè jou pou mande gouvènman pou li desann pri gaz la ak kont lavi chè a pou yo rete « Tèt Frèt ».
Nan diskou bay nasyon sa, lokatè Primati a mande popilasyon an pou kenbe kalm yo pou yo rete « Tèt Frèt » epi pou yo sispann zak vyolans ak zak vandalis yo. Chèf gouvènman te tou pwofitw denonse sèn piyaj ak atak yo te fè kont rezidans manm gouvènman an ak siyatè akò 11 septanm lan.
« Mwen kondane ak tout fòs zak vyolans yo anrejistre atravè peyi a, » te di Ariel Henry, tout pandan li senpatize ak viktim yo. Yon lòt bò, newochorijyen an fè konnen se pa pèp ki te nan lari a se pito yon bann gwoup nèg ak gwo zam fann fwa epi se pat pwoblèm grangou, ni koze gaz ki te mete yo deyò.
Se sak fè Ariel Henry di pa gen anyen ki ka jistifye domaj ki anrejistre nan jou ki sot pase yo nan kapital la ak nan kèk vil nan pwovens yo. « Tout moun ka konprann manifestasyon sa yo pa t an favè disponiblite gaz la, « te deklare Ariel Henry.
Anplis de sa, Doktè Ariel Henry bay garanti pwodwi petwòl yo disponib, nan yon kantite ki ase, nan tèminal yon fason pou yo kapab alimante ponp yo epi soulaje pwoblèm ratman gaz la nan peyi a.
