Mèt Charles Edouard Durand ki se Komisè Gouvènman Okap la fèmen byen bonè maten 5 janvye 2024 la « Tipsy Bar » nan ri 22 C, aprè 2 fanm ta fin fiyanse ladan l ayè 4 janvye a nan aswè.
Nan yon videyo k ap sikile sou rezo sosyal yo, Komisè a mansyone li te resevwa plizyè plent kont yon seri aksyon k ap fèt andedan disko sila. Li mansyone anplis anbyans MasiMadi k ap fèt andedan espas la, genyen agresyon ak zam epi menas lanmò k ap repete nan espas la tou.
Mèt disko a bò kote pa l, t ap kesyone komisè a si lalwa mansyone yon kote ki sètifye « yon biznis pa dwe resevwa yon kliyan ki fè pati LGBTQ+ ».
Pi lwen, Komisè Gouvènman Okap la kalifye konpòtman medam yo kòmkwa yon aktivite « malsèn » epi afime se yon « enfraksyon », se rezon ki ta lakòz yo fèmen espas disko sa.
N ap raple, nan lannwit 4 janvye sa, 2 fanm te prezan nan espas « Tipsy Bar » la ki nan ri 22 C, nan lide pou te ofisyalize relasyon anmourèz yo epi fè yon demann maryaj nan gran piblik la.
