Direksyon santral polis jidisyè (DCPJ) lanse yon avi rechèch kont Direktè sikisal Sogebank nan ri d’Arguin an, Jean Ralph Antoine, ki ta enplike nan dosye 132 mil dola ameriken ki te detounen nan bank lan.
Pòt pawòl Lapolis la, Enspektè Garry Desrosiers, ki t ap prezante ayè mèkredi 31 me a bilan PNH la nan kad operasyon Tònad la, konfime avi rechèch sa ki lanse kont Jean Ralph Antoine lan ki te deja kite peyi a.
Responsab sikisal Sogebank ri d’Arguin an ki nan komin Petyonvil, genyen Lapolis k ap chache l kou chen fou pou enplikasyon l nan yon kokennchenn operasyon detounman lajan. Daprè Pòt pawòl Lapolis la, DCPJ te tande sispèk la yon fwa deja avan l kite peyi a.
Jean Ralph Antoine ki twouve l pou kounya nan peyi Etazini, daprè Enspektè Garry Desrosiers, gen sou do l akizasyon tankou konplisite vòl, abi konfyans ak asosyasyon malfektè. Atravè yon manda entènasyonal, DCPJ ap itilize Entèpòl pou arete sitwayen sa.
N ap raple, nan menm kad dosye sa kote plis pase 132 milyon dola detounen sou kont kliyan yo, genyen St Paul Daphkar, Catheline Barochin ak Leevens Lifete Dejoie ki deja anba kòd.
