Komite konpetisyon yo nan Federasyon espanyòl foutbòl la pran desizyon jodi madi 23 me a pou retire katon wouj Vinicius Jr te pran nan match fas Valence lan kote l pa t sispann resevwa yon pakèt pawòl piman bouk rasis nan Mestalla a.
Atakan brezilyen an ki pa t fin jwe match wikenn pase an aprè katon wouj li ta pral pran pou batay li te genyen ak jwè Valence yo, benefisye desizyon Federasyon espanyòl la ki anile sanksyon abit santral match la te pran pou mete l deyò an.
Avèk desizyon sa ki sòti bò kote otorite espanyòl yo, Vinicius Jr ap kapab disponib pou jwe avèk Real Madrid demen mèkredi 24 me a pou match k ap mete yo fas pou fas ak ekip Rayo Vallecano a ki twouve l aktyèlman nan 11èm plas klasman Liga a.
Komite konpetisyon yo nan Federasyon espanyòl la chita desizyon l lan sou yon pati nan imaj yo ki pa t montre nan moman abit santral la te nan asistans videyo an kote genyen nan jwè Valence yo ki t ap agrese atakan brezilyen an.
Lòt desizyon ki pran ankò aprè ensidan sa, Valence ap gen pou peye yon amann 45 000 ewo epi tribin Mario Kempes yo an ap rete fèmen pandan 5 match, daprè sa medya espanyòl yo rapòte, avan yo rapouswiv pou fè konnen direksyon klèb la gen jiska 10 jou pou fè apèl.
