Aprè transfè li nan Inter Miami olye Barcelone ak Al-Hilal, Lionel Messi bay yon entèvyou avèk « Mundo Depertivo », yon fason pou l bay plis eksplikasyon sou rezon ki fè se nan MLS la li ale. Chanpyon mondyal 2022 a fè konnen « li vle viv foutbòl la yon lòt jan ».
Atakan ajanten an te mete FC Barcelone ak Al-Hilal nan mache prese pou yo te kapab siyen l. Ansyen jwè PSG an chwazi al jwe nan peyi Etazini pito. Pou rezon sa, li bay jistifikasyon jodi mèkredi a sou chwa li an nan Inter Miami kote l pataje kèk pawòl enpòtan ak fanatik li yo.
« M te kontan, m te vle retounen nan Barcelone men m te deja viv eksperyans sa lè m te kite klèb la. M pa t anvi konnen menm bagay la ».
« Mwen siyen nan Inter Miami, m vle viv foutbòl la yon lòt fason, paske aprè m te fin genyen mondyal 2022 a, m pa kwè m tap tounen nan FC Barcelone. M te jwenn anpil lòt òf an Ewòp men se sèl Barça ki te entèrese m. »
Ajanten an te kontinye pou di : » M wè Barcelone te nan difikilte pou lajan, kote fòk yo te vann jwè, bese kèk salè. M kwè liga te aksepte tout bagay sa yo, men sa pa t anpeche gen lòt bagay ki te dwe fèt. M konte retounen nan FC Barcelone yon jou. M pa konnen, men se klèb m renmen an. M renmen afeksyon fanatik yo. M espere yon jou m ap rejwenn yo. Xavi te vle m vini, men klèb la pa t rasire m ak 100%. Se pa pou lajan non plis m siyen nan Inter Miami, sinon m ta prale an Arabi Sawoudit ».
Facebook Comments