Ensekirite a k ap vale teren nan peyi d Ayiti pa epanye pèsòn. Bandi san fwa ni lwa k ap poze move zak nan sosyete a itilize tout mwayen posib pou lokalize moun ak fè viktim, tankou sou rezo sosyal yo, e nan foul la Polis Nasyonal d Ayiti (PNH) pa epanye.
Rezo sosyal yo reprezante yon gwo menas pou polisye yo nan ekzèsis fonksyon yo – menm jan pou tout moun tou. Si itilizasyon kèk rezo tankou Facebook, Instagram ak TikTok, pami kèk lòt, kapab itil pou fè lajan ak kreye viziblite, li genyen kote negatif li tou, patikilyèman sou teritwa ayisyen an kote majorite itilizatè yo ap montre yon vi an aparans, e pami yo polisye yo.
Wi, itilizasyon rezo sosyal yo kouran anpil pa bò kote plizyè polisye, daprè konsta nou fè. Plizyè fwa deja nou wè polisye – fanm kou gason – ak vizaj yo ki klèman idantifye ap itilize rezo sosyal yo swa pou fè yon mesaj pase, swa pou montre jan y ap pran plezi yo, elatriye. Lè konsa yo ekspoze tèt yo ak bandi k ap siyonnen sou rezo sosyal yo pou chèche moun pou fè viktim.
Si genyen nan yo ki konn kite yon kagoul sou vizaj yo pa prekosyon, genyen lòt ki konn parèt ak vizaj yo klèman. Lè konsa yo ekspoze san yo pa (konnen) konprann ak kan advès la, ki pa lòt bandi ki se itilizatè rezo sosyal yo tou.
Dènye viktim enstitisyon polisyè a resanse se Samuel François, yon polisye 27yèm pwomosyon ki abitye pibliye bon kontni sou rezo sosyal yo, swa pou adrese l ak popilasyon an oubyen jenn ki vle entegre PNH la. Li gen anpil enfliyans sou TikTok nan sans sa, san konte kontni li yo toujou pataje sou lòt platfòm.
Jenn polisye sila mouri dimanch 16 avril pase a anba bal bandi 400 Mawozo yo, nan zòn Rakèt, Kwadèboukè.
Pa gen okenn enfòmasyon ki lye lanmò polisye a ak enfliyans li sou rezo sosyal yo, men vizaj li te konsidere kòm yon “kat make” an rezon enfliyans li sou TikTok, e se pa sèl li.
N ap raple se pa sèlman polisye yo ki etann kò yo sou rezo sosyal yo nan lage kontni, plizyè militè ki fè pati lame teritwa a (FAd’H) ladan l tou – menm jan avèk bandi yo, ki itilize rezo yo pou retrase potansyèl viktim yo ak fè pou fè menas sou moun.
Depi kòmansman ane a Polis Nasyonal d Ayiti (PNH) pa epanye anba zak banditis yo k ap fè viktim sou teritwa a chak jou pi plis. Malgre dispozisyon yo pran pou rann sitiyasyon an pi konfòtab anyen pa rive amelyore, enstitisyon an resanse plis pase yon dizèn viktim ki tonbe anba bal bandi ak zam, san konte sa ki sibi zak kidnapin.
