Blese pou rès sezon an atakan Brezilyen an Roberto Firmino, p ap kontinye jwe pou Liverpool sezon k ap vini, jwè 31 lane a ap depoze valiz li nan FC Barcelone, daprè sa jounal britanik lan, “Daily Mail fè konnen. Yon enfòmasyon antouraj jwè a konfime.
Nan mitan mwa mas la, Jürgen Klopp te gentan anonse depa Roberto Firmino sezon k ap vini. Daprè enfòmasyon “Daily Mail” Atakan Liverpool la jwenn yon atant ak FC Barcelone, l ap rejwen Catalan yo lib, paske kontra l ap fini ak Reds yo. Jwè a ki ap rate rès sezon an ak Liverpool akoz li blese, ap la nan dènyè jounen an pou l di fanatik yo babay.
Firmino se youn nan eleman enpòtan, ki te ede klèb anglè a rejwenn plas li nan an Ewop aprè yon bon tan Liverpool te pase ap trenen, menn lè sa pa fin bon kounya. Ak klèb la li pran Champions League la, Premier League la tou.
Pasaj Brezilyen an nan Liverpool make lespri anpil moun, espesyalman fanatik Reds yo, ki te konnen anpil bèl moman ak bèl pèfomans jwè a te konn bay nan mouye mayo klèb la. Pou pasaj li nan ekip la, li jwe 353 match, li fè 131 gòl. Sezon k ap vini se sou mayo Catalan, li pral kontinye fè gòl.
Aprè Sadio Mané, se tou pa youn lòt jwè nan triyo ki te ede Liverpool konpetitif pendan lontan. Yon preyokipasyn dirijan Liverpool yo kapab genyen : Eske Mohamed Salah p ap kite ekip la aprè depa 2 jwè sa yo? Liverpool ki pral gen anpil pou l fè sou mache transfè ete a.
