Jedi sa nan aswè, Ti Greg, gwo chèf gang Dèlma 95 lan, jwenn lanmò li pandan yon gwo afwontman ak lapolis, daprè sa yon sous enstitisyon an konfye manm redaksyon NetAlKole Media.
Ti Greg ki te yon gang ki te konn ap fè pale de li akoz mechanste li te konn komèt nan kominote Dèlma a, espesyalman Dèlma 95, dènyèman te chape sòti nan prizon penitansye nasyonal aprè bandi ak zam te fin anvayi prizon sila a. Retounen li nan Dèlma 95, rapidman li fè reviv laperèz lakay popilasyson Dèlma a.
Sepandan, lapolis te aji byen vit pou mete fen nan rèy laterè Chèf gang sa a. Detay yo sou ensidan an poko klè, men daprè enfòmasyon ki vin jwenn nou, sanble Ti Greg te enplike nan yon konfwontasyon ak Lapolis, sa ki lakòz lanmò lidè gang lan.
Nouvèl sila a mennen anpil kesyon sou efikasite mezi sekirite nan katye a, paske rezidan yo ap mande si lanmò Ti Greg pral mete fen nan vyolans san k ap pase depi lontan nan Dèlma a ak kèk kote nan komin Petyonvil, oswa si li pral louvri wout pou plis nouvo eklatman ant gang lokal yo.
Yon lòt bò, otorite yo poko fè kòmantè ofisyèlman sou ensidan an. Pandan tan sa, abitan Dèlma 95 yo rete vijilan, yo espere disparisyon Ti Greg la make kòmansman yon epòk lapè ak estabilite nan katye yo ki te boulvèse ak vyolans gang yo.
Facebook Comments