Jodi mèkredi a, Real Madrid ofisyalize transfè jèn jwè anglè a, Jude Bellingham, ki kite Borussia Dortmund aprè anpil bèl pèfòmans. Yon transfè ki fè bonè sipòtè Merengue yo nan tout mond lan. Men sa pa anpeche Toni Kroos mete yon bemòl sou transfè jwè a nan yon podcast, epi kwè l pa p pase menm jan ak Eden Hazard nan klèb la. Alman an enpasyan pou l wè l k ap jwe.
Jude Bellingham se jwè Real Madrid. Yon transfè ki koute klèb la 134 milyon ewo. Tout fanatik ap tann pou yo wè jwè a k ap mouye mayo madrilèn lan nan mitan tèren an. Se menm bagay la pou Toni Kroos ki swete wè anglè 19 lane a resiyi nan klèb Madrid la.
Nan sans sa, ansyen Chanpyon mondyal 2014 la fè konnen nan yon podcast sou Diario AS: ” Se yon jwè ki nan wo nivo a, anpil ekip te vle genyen pou laj li ak kalite li. Si Real Madrid bay tout kòb sa pou li, m espere se ap yon bon afè pou nou. Si l reyisi menm jan l te fè l ak Dortmund lan, m kwè se ap yon bon ranfò pou nou.”
Jwè a te ale pi lwen pou l te montre Eden Hazard ki te vini nan ekip la pou anpil lajan pa t itil yo anyen.
” Nou te gen yon jwè ki te vini nan klèb la pou anpil kòb, ki te pwomèt anpil (Eden Hazard). Klèb la te depanse anpil kòb pou li, tout moun kapab di se pa t yon bon afè. Men nou dwe rete konfyan pou Jude Bellingham”, deklarasyon mitan tèren alman Real Madrid lan.
