Nan chita pale ak jounalis Jean Mary Simon, ki disponib depi 21 mas la, Wendyyy devwale li te manke kraze kite sa ak karyè atistik li. Rapè a esplike rezon ki fè l te sou wout bay vag.
Wendyyy te konnen yon moman difisil nan lavi l, sa ki te pouse l fèmen nan silans li pou l pran swen tèt li avan l te tounen an flanm. “Mwen te vin detache paske nan moman mwen te DOWN mantalman, m reflechi anpil nan moman sa epi m di èske sa entèrese m toujou pou m al fè mizik ankò”, rapè a esplike jounalis la.
Tounen natif Yogann lan fè valè l monte, grandi “fanbase” li epi pote siksè li potko konnen nan karyè li. Videyo l yo ak mizik li yo konnen gwo chif nan ti kal tan. Men tout sa yo te ka pa posib si Wendyyy te pran lòt chimen. Se tout sa l te gen nan lide l nan moman nwa yo.
“M te menm panse al batize, remèt Bondye lavi m jan yo konn di a. Aprè, se paran m ki ban m direksyon ki di m pa prè, gen yon pakèt bagay m sipoze amelyore lakay mwen, gen yon repetans ki dwe fèt”, sa li rapouswiv pou l di.
Fason biznis mizik fonksyone isit pa fè Traka plezi, se youn nan rezon ki te ka fè l pa janm tounen. “Se mache a, mantalite a. M di èske jan nou ye a la, jan nou ap fonksyone nan mache a sa merite pou m retounen vin fè mizik, vin melanje nan menm zizani an”, atis la t ap mande tèt li.
Toutfwa, Wendyyy te retounen sou desizyon l pou bonè Chinwa yo. Jounen jodi a, li gen yon kominote enkonparab k ap swiv li e pote pwojè l yo. Li kontinye ap ekri yon listwa k ap gen pi bèl chapit tank jou ap swiv jou.
Facebook Comments