Alphonso Davies louvri eskò a pou Kanada devant Kwoasi, nan dezyèm jounen gwoup F la, dimanch 27 Novanm nan. Se premye fwa yon Kanadyen fè gòl nan tout istwa Koupdimonn lan.
Jan nou konnen l deja, se dezyèm fwa Kanada ap patisipe nan Mondyal la. Premye fwa yo te patisipe, nan lane 1986, yo pa t rive fè filè yo tranble. Pou 22è edisyon Mondyal la, yo retounen nan batay la e yo pa kite okazyon an pase pou yo fè gòl.
Nou t ap jwe dezyèm minit nan match la lè Alphonso Davies fè bèl kout tèt pou l bay Kanada avantaj la sou Kwowat yo. Malgre Kanada te jwenn yon dividal okazyon devan Bèljik, li pa t rive konkretize youn. Men jwè John Herdman yo pa t pèdi tan fwa sa pou yo fè sa.
Alphonso Davies, se lateral goch Bayern Munich nan peyi Almay. Li gen 22 lane e li ranpòte Champions League la deja avèk Bavawa yo. Li fèt nan yon kan refijye e li te rejwenn peyi Kanada lè l te gen 5 lane paske paran l t ap sove pou gè sivil.
Menm si konpetisyon an jèn toujou, Davies se jwè ki fè gòl pi bonè nan Mondyal sa. Gòl sa p ap janm sòti nan listwa.
Facebook Comments