Vrèmanvre, Ayiti ap fè fas depi kèk lane ak anpil pwoblèm ki pouse anpil nan sitwayen Ayisyen yo al chèche lavi miyò yon lòt kote. Kèk nan pwoblèm sa yo enkli povrete, koripsyon, vyolans, enstabilite politik, dezas natirèl, elatriye.
Sitiyasyon peyi a te vin pi grav nan dènye ane yo akoz kriz ekonomik ak politik ki te lakòz yon ogmantasyon vyolans ak ensekirite nan peyi a. Anplis de sa, dezas natirèl tankou tranblemanntè 2010 la ak siklòn Matthew an 2016 te gen konsekans devastatè sou popilasyon an ak ekonomi peyi a, sitiyasyon sila ki vin pi grav depi aprè lanmò ansyen Prezidan Jovenel Moïse nan lane 2021 an.
Kòm rezilta, anpil Ayisyen te chwazi kite peyi a pou yo al chèche lavi miyò yon lòt kote, souvan nan Amerik di Nò, Ewòp oswa Amerik di Sid. Sepandan, migrasyon iregilye yo souvan danjere epi koute chè, mete sou sa migran yo konn fè fas ak anpil defi, tankou eksplwatasyon, diskriminasyon, detansyon ak depòtasyon.
Biwo Nasyonal pou Migrasyon (SNM) nan peyi Panama, nan yon rapò sou migrasyon montre peyi ki te gen plis imigran ki antre nan peyi Panama pou 2023 a, se Venezyela ak Ayiti. Vrèman vre, Ayiti vin an dezyèm pozisyon avèk plis pase 23 000 imigran ki travèse forè Daryen an pou lane 2023 a.
Nan rapò sila, Biwo Nasyonal pou Migrasyon (SNM) an, fè konnen arive prensipal imigran nan mwa mas la , Sa yo ki soti nan peyi Venezyela , ak 28,816; Ayiti, 6.896; Ekwatè, 2.772; End, 913; Kolonbi, 1.260; Repiblik Dominikèn, 84; Kiba, 220; ak lòt peyi yo, 5,138.
N ap note, li enpòtan pou gouvènman ayisyen ak entènasyonal la travay pou rezoud pwoblèm ki pouse moun yo kouri kite peyi yo, nan bay opòtinite ekonomik, asire sekirite, konbat koripsyon, ak bay èd imanitè ak popilasyon vilnerab yo.
Facebook Comments