Aprè Real Madrid te fin kase dan l fas ak Villarreal nan Liga a (2-1) epi pèdi final Super Koup Espay la fas ak Barcelone (3-1). C.Ancelloti te nan gwo difikilte, ayè dimanch lan fas ak Athletic Bilbao, koyekipye Benzema yo genyen 2-0. Yon viktwa ki mete madrilèn yo a 3 pwen ak lidè a, Barcelone, ki te genyen Cadiz (1-0).
Real Madrid bat Bask yo (2-0), epi redwi eka li ak Barcelone nan Liga a pou 18tyèm jounen an. Yon viktwa ki bay Ancelotti yon souf pou dènye rezilta li yo ki te movè, sitou imilyasyon fas Barcelone (3-1) an pou super Koup Espay la nan peyi Arabi Sawoudit.
Benzema (24triyèm) epi T. Kross (90zyèm) ta pral ede Real genyen epi relanse ane 2023 yo a. Se te yon match enpotan pou jwè Real yo, ki pat vle bay Barcelone tèt klasman Liga a ak 6 pwen devan yo. Aprè rankont sa a, Barcelone gen 44 pwen epi Real 41 pwen, chak ekip yo gen yon match an reta.
Rankont sa, se te yon posibilite pou Balon dò 2022 a antre plis nan istwa Real Madrid la, kote li rive make 228 gòl sou mayo Casa Blanca a. Benzema depase Raul epi vini 2zyèm meyè bitè Real Madrid nan do C. Ronaldo (311 gòl).
Ancelloti ap prepare jwè li yo, pou match kap mete bab pou bab Real Madrid ak Atletico Madrid nan kadefinal Koup Wa a, jedi k ap vini, anvan menm li afwonte Real Sociedad nan Liga Dimanch pwochen an.
