Depi plizyè semèn, anplwaye Elektrisite d Ayiti (EDH) yo te fè grèv pou yo pwoteste kont kondisyon travay yo ak pou yo mande kòb 5 mwa travay. Men, ayè vandredi 12 me 2023 a, anplwaye yo mete fen nan grèv yo te kòmanse 18 avril pase a, aprè yo fin jwenn yon antant ak otorite konsène yo, daprè Pierre Michel Félix, responsab sendikal nan enstitisyon sila a.
Ayè vandredi 12 me an, anplwaye EDH yo ki te kòmanse yon grèv depi nan mwa avril la, jwenn yon akò ak otorite konsène yo sou revandikasyon yo t ap mennen nan lide pou yo mande 5 mwa salè yo. Vrèman vre, otorite yo pwopoze anplwaye yo y ap ba yo de (2) sou senk (5) mwa aryere salè yo dwe yo, epi pwomèt yo y ap jwenn twa (3) lòt yo nan fen mwa me a, daprè sa lidè sendika a te rapòte, tout pandan li fè konnen apre plizyè rankont se sa Minis Travo Piblik, Transpò ak Kominikasyon an, enjenyè Rosemond Pradel te pwomèt yo.
Yon lòt bò, Pierre Michel Félix, responsab sendikal nan enstitisyon sila a, fè konnen yo pa ta renmen viv yon eksperyans konsa kote plizyè komin nan depatman Sant ak Lwès te pase preske yon mwa nan yon blakawout total, kote je popilasyon an pa t janm kontre ak kouran EDH.
N ap note, depi anons sila a ki fè konnen grèv anplwaye EDH yo fini, plizyè katye nan komin Dèlma deja kòmanse jwenn ti mòso kouran EDH.
