Biwo Nasyonzini pou Kowòdinasyon Afè Imanitè revele nan yon nouvo rapò sou Ayiti se akòz grangou ak lamizè ki fè Ayisyen yo ap sove kite peyi a konsa pou al chache lavi lòt kote.
Rapò sila koresponn ak ane 2022 a patikilyèman, epi etale kantite vyolans ki fèt pandan peryòd sila, mete sou sa politik la k ap deteryore, ekonomi an ki rete sou plas, pami lòt faktè toujou ki enfliyanse kondisyon vi aktyèl pèp ayisyen an.
Menm jan an tou, li fè remake kijan zak vyolans yo rive nan “yon nivo san parèy”, rezon prensipal, daprè rapò a, ki fè Ayisyen deside ap kite teritwa yo konsa san gade dèyè.
“Gang ame yo ap kontwole plis teritwa de jou an jou, sitou nan kapital la, Pòtoprens, kote y ap fè abi kont popilasyon an epi lakòz deplasman,” rapò a te di.
Biwo Nasyonzini pou Kowòdinasyon Afè Imanitè a souliyen tou sitiyasyon sa rive posib depi lè anons Leta ayisyen te fè sou anilasyon sibvansyon pri gaz la sou mache lokal la, sa lakòz peyi d Ayiti plonje nan yon kriz san parèy ki lakòz manifestasyon, kraze brize, san konte gang te pran kontwòl tèminal petwòl peyi a, Varreux ki sitiye li nan Site Solèy. Blokis sila te paralize aktivite ekonomik ak sosyal yo, epi limite aksè popilasyon an ak sèvis baz yo, pou n site sa yo sèlman.
