Lèzetazini anonse ogmantasyon pri kèk viza tankou touris, afè, etidyan, travayè tanporè ak envestisè, apati 30 me k ap vini la.
Pri viza touris ak afè yo (B1/B2 ak BCC) epi viza etidyan ak echanj yo ap pase de 160$ a 185$. Tarif kèk viza travay tanporè (H, L, O, P, Q ak R) ap pase 190$ pou rive 205$, tandiske viza pou komèsan ak envestisè yo (E) ap pase 205$ pou rive 315$.
Depatman d Eta ameriken an fè konnen nan yon kominike, frè pou viza ki pa pou imigran yo kalkile apati kòb sèvis konsilè yo koute. Dènye revizyon pri sila yo te fèt depi 2014.
Depatman d Eta asire viza travay ak touris yo jwe yon wòl esansyèl pou politik etranjè aktyèl prezidan ameriken an, Joe Biden, ki rekonèt wòl fondamantal vwayaj yo jwe nan ekonomi ameriken an. Konsa, li angaje l pou l fasilite imigran ak sila ki pa sa yo vwayaje Ozetazini.
