Bandi ak Lapolis ap twoke kòn yo nan plizyè kwen nan komin Kafou, prekosyon pa kapon !

Twa moun mouri, plizyè lòt blese anba bal jodi madi 30 me 2023 a, pami yo yon polisye yo rekonèt sou non Ti BIM, aprè Lapolis ak bandi ki ta soti Tibwa, manm gwoup gang Krisla, ta tanmen yon afwontman, daprè premye eleman enfòmasyon yo.

Thank you for reading this post, don't forget to subscribe!

Jodi madi a, plizyè katye nan komin Kafoux espesyalman Lamanten 54 ak Bizoton, touprè Marin ayisyen an, leve anba gwo tansyon. Plizyè rafal katouch pa sispann chante mikalaw. Enfòmasyon yo fè konnen se ta plizyè ajan Lapolis k ap twoke kòn yo ak plizyè bandi ki ta sanble manm aktif baz Krisla nan Tibwa. Twa (3) moun pèdi lavi yo, ladan yo Ti BIM, yon polisye ki detache ak komisè Kafou a. Enfòmasyon yo revele bandi yo chape ak kadav polisye a.

Nan plizyè videyo k ap sikile sou rezo sosyal yo, nou kapab remake prezans plizyè endividi ak gwo zam fann fwa nan men yo epi kagoul nan vizaj yo. Poko gen yon bilan ofisyèl sou kantite blese yo. Men nou konfime lanmò 3 moun, pami yo yon polisye yo abitye ak li sou non “Ti BIM”.

Plizyè abitan nan komin Kafou anba gwo enkyetid. Li mande anpil pridans ak moun k ap sikile oubyen k ap pran direksyon Lamanten 54 ak Bizoton. Pou moman n ap ekri la, sitiyasyon an toujou rete konplike. Toutfwa, redaksyon an konfime gen omwen 3 moun ki pèdi lavi yo nan kad afwontman gwo ponyèt sila a.