Aprè anons Karim Benzema k ap kite Real Madrid la, desizyon Fransè a mete ekip la nan yon gwo enstabilte. Aprè rakle fas Manchester City a, dirijan Real Madrid yo te santi gen gwo pase men ki pou fèt nan ekip la. Transfè Balon dò 2022 a mete klèb la nan gwo enkyetid pou sezon kap vini an. Kesyon k ap poze se ki jwè ki pou vin ranplase bitè Fransè a epi kèk lòt pou vin ranfosè efektif Carlo Ancelloti a.
Malgre kèk jwè kad Merengue yo kapab konte sou yo sezon kap vini an tankou Courtois, Tchouameni, Rodrygo, Valverde, Vinicius, sa pa sifi pou Real Madrid batay ak klèb yo nan Liga a ak Lig dè Chanpyon an. Ale Benzema kite yon vid paske Merengue yo te konte kenbe Fransè a pou yon lòt sezon, sa ki mete Florentino Perez nan anpil mache prese pou jwenn jwè pou ranfosè ekip la.
Aprè Varane, Casemiro sezon pase, sezon sa se Asensio, Eden Hasard, Mariano Diaz, Benzema, epi Nacho kapap ale nan menm sans lan, sa ki fè dirijan yo panse ak yon revolisyon nan klèb la, san bliye Toni Kroos ak Luka Modric ki pa gen menm nivo a, anplis ki rete yon sezon nan klèb la.
Real Madrid gen plizyè non li anvi pran sou mache transfè a. Harry Kane, Victor Oshimen, Dusan Vlahovic, Kai Havertz. De lòt jwe Merengue yo te kapab mize sou yo se Erling Haaland ak Kylian Mbappé ki se 2 jwè Madrilèn yo paka touche. Si Real Madrid bewzen rete nan wo nivo foutbòl la sezon k ap vini, fòk ekip la ranfose. Transfè Karim Benzema a se yon bon okazyon, pou klèb la tanmen revolisyon an, malgre enkyetid yo.
