SPORTS

Christiano Ronaldo vin jwè ki fè plis gòl nan tout istwa football la 

Source Image : Onze Mondial

Manchester United t ap resevwa Tottenham nan kad yon match ki te enpòtan anpil nan kous pou yon plas k ap bay kalifikasyon pou pwochen lig chanpyon an, samdi 12 mas la. Gras ak twa (3) gòl Christiano Ronaldo make, dyab wouj yo rive ranpòte dyèl sa 3 a 2. Triple sa tou pèmèt pòtigè a vin jwè ki fè plis gòl nan tout istwa football la. 

Christiano Ronaldo fè listwa, yon lòt fwa ankò. Yon lane aprè l te fin pase devan Pelé epi vini dezyèm jwè ki make plis gòl nan tout listwa football la, samdi 12 la, fas a Tottenham, Ronaldo make 805èm, 806èm ak 807èm gòl nan match ofisyèl nan karyè l. Li pase devan Josef Bican ki limenm te enskri 805 gòl. 

Depi nan 12ème minit, Christiano Ronaldo te pèmèt Manchester United pran avantaj (1-0) nan match la gras ak yon gwo chout deyò kare (20 mèt anviwon). Harry Kane te egalize pou Tottenham nan 35èm minit sou pennal (1-1). Touswit aprè, pòtigè a ta pral fè 2-1 an nan 38èm minit. Aprè H. Maguire ta pral bay tèt li gòl nan 72èm minit (2-2), nan fen match la, Ronaldo ta pral rebay Manchester United avantaj la ak yon kout tèt gadyen franse a Lloris pa t ka anpeche antre nan kan (3-2 ; 82èm). Triple sa – Ki se 59èm li – tou pèmèt jwè a antre byen fon nan liv istwa. 

Advertisements

Si souvan gen diskisyon sou zafè 805 gòl otrichyen an, Josef Bican, ta enskri a malgre se sa FIFA bay kòm chif ofisyèl, kanta 807 gòl Ronaldo yo, pa gen okenn dout : 450 gòl ak Real Madrid, 136 ak Manchester United, 101 ak Juventus, 5 ak Sporting Portugal ak 115 ak seleksyon Pòtigal la. 

N ap raple, non sèlman Christiano Ronaldo se jwè k make plis gòl nan istwa football la, se jwè k make plis gòl nan Lig chanpyon, se meyè bitè koup dewop, se meyè bitè koupdimond klèb chanpyon an e se meyè bitè istwa Real Madrid. 

Facebook Comments

Peterson Dorsainvil
Peterson Dorsainvil est journaliste, écrivain, slameur et amoureux fou des lettres. En quête de moi-même, je fais de ma plume ma boussoule dans ce monde désorienté.