4 endividi ki abiye ak inifòm lapolis kidnape epi asasinen yon nouvo jounalis ki se alafwa animatè kiltirèl, li se Ricot Jean, manm aktif sal nouvèl Radyo-Télé Evolution Inter nan Senmak, li te akonpanye ak yon bon zanmi li ki, malerezman mouri tou. Zak sasinay sa a fèt nan lannwit lendi 24 pou louvri madi 25 avril 2023 a, daprè konfimasyon Alcide Volcy. Konsta legal yo sou kadav jounalis la montre enpak plizyè kout bal sou li san konte mak wouj ak ble yo jwenn sou po l, kòmkwa yon moun yo ta bat.
Li fèt epi grandi nan vil Grande Saline, Ricot Jean te jounalis animatè nan milye kote li grandi a, anpil moun konnen l sou non “DJ For Ever” li se prensipal òganizatè emisyon popilè “Jamè dodo” ki pase chak wikenn.
“4 mesye kidnape l ak yon zanmi pwòch li nan Cité Verna, li te nan lè 8è nan aswè, bandi yo te itilize inifòm inite depatmantal lapolis (UDMO), sou pretèks yo vin arete Ricot ak zanmi an”, deklarasyon Alcide Volcy.
“Tou 2 mesye yo mouri”, te konfime Alcide Volcy, popilasyon an jwenn kadav 2 mesye yo nan yon lokalite ki pote non “Anba Gwomòn” nan Sen Mak.
Malvenyan yo kontinye ogmante chif viktim yo nan mitan jounalis yo an Ayiti, nan mwens pase 2 semèn aprè yo fin touye Dumesky Kersaint nan lannwit 15 pou rive 16 avril 2023 pase a, Ricot Jean se aktyèl viktim nan.
Poko gen pyès detay sou lanmò konfrè a, men nou ka konfime se te yon zak kidnapin, redaksyon an pataje tout senpati li ak fanmi vintim nan espesyalman Radyo-Télé Evolution Inter
