Sa gen anviwon plizyè semèn depi n ap konstate yon seri piblikasyon sou rezo sosyal yo ki montre kijan pinèz anvayi peyi Lafrans tankou yon epidemi. Anpil Fransè pa sispann rapòte, ti ensèk ki pote non pinèz la, depase limit li.
Sou tout rezo sosyal yo, fransè yo ap pibliye videyo kote yo jwenn yon dividal nan ti bèt sa yo nan anpil kote nan anviwònman piblik tankou lopital, tren, sal sinema ak inivèsite epi rezidans pou etidyan.
Medya lokal PIP rapòte yon paragraf atik medya fransè a BFMTV te pibliye ki di : « espesyalis yo menm fè konnen vag pinèz sa afiche gwo rezistans anba pwodui yo itilize pou elimine yo. Anpil abitan enkyè ak aparisyon ensèk sa nan peyi Lewòp yo depi 1990 kote yo te plis konn jwenn yo nan matla ».
Pandan dènye moman sa yo, pinèz, jan li rele a, kite chanm pou anvayi espas piblik yo. Nan vil tankou Lyon ak “Boulogne-sur- Mer”, semèn pase a otorite yo te konstate yon latriye pinèz andedan lopital yo, BFMTV kontinye rapòte, yo te menm diminye nan lè sèvis yo pou yo te dezenfekte espas ti bèt sa yo te loje yo.
N ap raple, depi fen semèn ki sot pase a, se gwo pwotestasyon ki te genyen nan kèk lekòl nan vil Lyon ak nan plizyè rezidans pou etidyan toujou akoz pinèz ki anvayi yo.
Yon lòt bò, anpil mezi kòmanse pran, sitou bò kote responsab sinema yo ak konpayi tren yo ki nan gwo enkyetid pou yo pa pèdi kliyan yo akoz sitiyasyon an. Pami desizyon ki pran pou konbat pinèz sa yo, responsab yo lanse gwo kanpay netwayaj epi vaporizasyon ensektisid nan espas yo. Anplis, yo simen yon poud ki rele dyatòm epi pase yon jèl anti-nwizib nan zòn ki riske sèvi kachèt pou ti bèt sila yo, toujou daprè PIP.
