Atakan Nòvejyen an ki reyalize yon sezon san parèy sou koulè ekip Manchester City a ki ranpòte chanpyona anglè sezon sa, genyen jodi samdi an pri pi bon jwè ak meyè jèn talan pou Premier League la.
Erling Haaland ki enskri 36 gòl pou 35 match li jwe nan chanpyona anglè an sezon sa, ranpòte pri meyè jwè sezon an kote l fini devan mitan tèren Bèlj la, Kevin De Bruyne, ekipye l nan Manchester City, ki te genyen pri sa sezon avan an.
Cyborg la ki bat rekò jwè ki enskri plis gòl nan Premier League la sou yon sèl sezon, vini premye jwè nan chanpyona anglè ki ranpòte sou yon sezon pri pi bon jwè ak meyè jèn talan nan foutbòl anglè a.
Nan yon kominike klèb Citizens lan pibliye jodi samdi a, Erling Haaland pa kache kontantman l sou pri sa yo li ranpòte a. « Se yon onè pou mwen vini premye jwè ki ranpòte tou de pri sa yo sou yon sèl sezon », yon pati nan deklarasyon atakan Nòvejyen an.
Yon sezon kolosal pou ansyen jwè Borussia Dortmund lan ki gentan mete mak li nan Premier League la pou premye sezon l nan foutbòl anglè a. Cyborg la se egalman meyè bitè Lig dè Chanpyon an avèk 12 gòl.
