Jodi vandredi 2 jen 2023 a, gouvènman ameriken an anonse li pran sanksyon kont ansyen Premye minis ayisyen, Laurent Salvador Lamothe, pou kesyon korispyon.
Nan yon deklarasyon pou laprès, Sekretè deta ameriken an, Antony J. Blinken, fè konnen ansyen premye minis ayisyen an, Laurent Salvador Lamothe, gen entèdiksyon pou antre sou teritwa Etazini an.
Ansyen Chèf gouvènman an ki te egalman okipe fonksyon Minis planifikasyon, ta detounen pou pi piti 60 milyon dola ameriken nan kòb gouvènman Ayisyen an, daprè kominike sa ki piblik.
Yon lòt kote, gouvènman ameriken an akize Laurent Salvador Lamothe kòm youn nan moun ki ta responsab sitiyasyon enstabilite Ayiti ap travèse jounen jodia.
Nap raple, Etazini pa premye peyi ki pran sanksyon kont ansyen premye minis lan ki te nan tèt gouvènman peyi a sou prezidans Michel Joseph Martelly sòti 16 me 2012 pou rive 14 desanm 2014.
Nan fen ane 2022 a, peyi Kanada te deja sanksyone Laurent Salvador Lamothe ki te voye jete akizasyon yo byen lwen epi te menm mande gouvènman kanadyen an retire non li nan dosye sa .
