Evite zòn Kafoufèy yo pou jodi a, anpil kout bal ap tire

Witson Beaujour
Par Witson Beaujour  - Rédacteur
evite zòn kafoufèy yo pou jodi a, anpil kout bal ap tire (1)

Depi anviwon plizyè mwa, bandi Gran Ravin yo pa sispann miltipliye atak yo kont kèk zòn nan Kafoufèy, menmsi rezon yo rete entolerab. Bandi yo pa brennen lè se inosan ki pa sispann viktim anba presyon y ap fè sou popilasyon an depi byen lontan.

Pou sèlman ayè mèkredi 24 me a, plizyè moun blese anba bal bandi Gran Ravin aprè yon atak yo te fè nan kèk enpas nan zòn Kafoufèy. Popilasyon an kriye san, yo lage 2 bwa pandje, menm pou al lopital ak blese yo se yon lòt risk ki pran. Sa ki te parèt pi tris anba kouche solèy la, se yon ti gason ki pa gen plis pase 15 lane ki pèdi lavi l aprè li ta resevwa yon bal pandan l t ap sot lekòl. Paran an ki t ap tann avèk enpasyans rantre ti bononm sa, malerezman al jwenn li atè sou yon adoken san souf.

Pou maten jedi 25 me a, kout bal yo pa sispann chante. Bandi yo montre yo pran plezi nan masakre moun ki ta ka manman, papa, kouzin, pitit yo oubyen nenpòt manm nan fanmi yo. Li vin plis enpòtan pou moun Kafou, Bizoton ak Fontamara k ap evite wout Matisan an pou yo ta evite wout Kafoufèy yo tou paske chèche lavi konn detwi lavi pafwa.

Plizyè kote nan Kafoufèy blanch. Machann yo ki konn vin chèche kote lavi fè kwen nan kèk mache pou sove grangou nan vant pitit yo, oblije rete san anyen lakay yo ap tann fòs lòd yo fè yon bagay

Leta rete bèkèkè, olye de sa, yo plis kwè nan entèvansyon yon fòs etranje olye yo aji ak mwayen epi kapasite yo genyen. Gouvènman ki la santi l pa gen ase fòs pou fè fas ak sitiyasyon sa pandan popilasyon an pa sispann konte kadav. Se tout rezon sa yo ki pouse pwopagasyon mouvman « Bwa Kale » a, paske lespwa sanse disparèt. Pran kontwòl kèk rakwen nan Kafoufèy ak Soukomisarya a se sèl anbisyon sinik malfra yo. Zòn tankou Foucha, Wout Dal, Karidad, pou n site sa yo sèlman, anba gwo tansyon. Li tap enpòtan pou yon moun k ap franchi limit sa yo pran anpil prekosyon paske manm gwoup kriminèl Gran Ravin yo san pitye fas popilasyon an.

Facebook Comments

- Advertisement -
Partagez cet article
Witson Beaujour
Par Witson Beaujour Rédacteur
Witson Beaujour, journaliste-rédacteur, chanteur, musicien et mécanicien industriel. Passionné de reportages, de documentaires et de lecture.