Depi kèk jou gen yon fyèv k ap sakaje anpil moun nan kapital la. Gen moun ki kwè se yon epidemi, konsa tou gen lòt ki panse se klima a ki ta lakoz fyèv sa. Li enpòtan pou nou konnen fyèv pa yon maladi, se tanperati kò a ki monte, se yon sentom ki mande anpil kontwòl. Kò nou fèt pou l gen yon tanperati nòmal (37°C) lè nou an repo, fyèv se yon bon mwayen pou kò a ka defann li kont bakteri ak viris ki ta vle ba l pwoblèm. Men kèk bagay ou dwe konnen lè yon fyèv ap fatige w anpil.
Depi yon moun gen fyèv li toujou panse li malad, poutan se tanperati kò a ki ogmante, fyèv la se yon mwayen pou kò a ka batay kont bakteri ak viris ki menase l. Fyèv la manifeste nan kò yon moun lè gen yon estrès nan kò a, pi souvan yon enfeksyon oubyen yon bakteri.
Pou yon moun mezire tanperati kò li, li ta sipoze gen yon tèmomèt, pou timoun ki rive nan laj 5 lane yo se kote yo fè bezwen yo epi granmoun yo se nan bouch yo pou tamperati kò a mezire.
Kèk bagay ou dwe konnen pou premye swen lè w gen fyèv
- Avan yon moun pran ibipwofèn, li ta enpòtan pou l konnen si l pa gen pwoblèm tansyon, pwoblèm ren e li pa bon pou yo bay yon timoun ki gen 6 mwa ibipwofèn ni fanm ansent.
- Moun ki gen fyèv la dwe pran repo pou kò a ka konbat kont bakteri yo oubyen enfesksyon an
- Rafrechi kò a tanzantan ak yon sèvyèt mouye oubyen benyen ak yon dlo ki tyèd
- Pran te asowosi ak sitwon oubyen simen kontra
Kèk bagay ou dwe evite lè w gen fyèv
- Pa bay timoun ki gen tous ak grip yo aspirin paske sa ka ba yo alèji
- Fè fiksyon ak kleren pa bese tanperati kò a vre, kleren an ap antre nan kò moun nan a travè pò li yo, sa ki ka fè kò a delala
- Pa benyen ak dlo ki frèt anpil men benyen ak dlo ki tyèd
- Men yo dwe lave tanzantan pou diminye risk direksyon yo
- Pa rete kole sou moun ki deja gen yon maladi ki ratrapan
Si tanperati kò a depase 40°c, moun ki gen fyèv la ap jigote, moun nan tounen entatad, l ap enpòtan pou yo mennen l nan sant sante ki pi pwòch li a, prekosyon pa kapon se mèt kò ki veye kò.
Facebook Comments