Dènye bilan Ministè sante piblik ak popilasyon an (MSPP) rann piblik madi 21 fevriye an fè konnen gen 594 moun ki mouri nan reparèt maladi kolera nan peyi an avèk anviwon 2,000 nouvo ka ki anrejistre.
Epidemi kolera ki ta pral refè aparisyon l sou teritwa nasyonal la nan mwa oktòb ane ki sot pase a, deja voye anba tè anviwon 600 ayisyen avèk anviwon 22 469 ka sispèk maladi sa.
Aprè plis pase twa lane san konnen okenn ka kolera, Ayiti ta pral frape yon lòt fwa ankò ak epidemi sa nan mwa oktòb ki sot pase a, kote kat mwa aprè, pou pi piti 594 moun deja ale nan peyi san chapo daprè chif ofisyèl yo.
Nan mitan mwa janvye ki sot pase an, Òganizasyon mondyal sante (OMS) te deja atire atansyon kominote entènasyonal la sou prezans epidemi kolera nan mond lan, kote pou kounya li vin difisil pou jwenn vaksen yo.
N ap raple, Ayiti ta pral anrejistre premye parèt epidemi kolera sou teritwa nasyonal la nan mwa oktòb 2010, nan depatman Sant, avèk prezans ajan MINUSTAH yo nan peyi an.
