Direksyon Santral Lapolis Jidisyè a (DCPJ) mande majistra egzaminasyon Walther Wesser Voltaire pou l bay yon manda arestasyon kont ansyen detantè MJSP a, Mèt Berto Dorcé, nan kad ankèt sou enpòtasyon zam ak minisyon, atravè bato Miss Lily, nan dat ki te 1ye jiyè 2022 a.
Direksyon Santral Lapolis Jidisyè a (DCPJ), te fè konnen nan yon rezilta ankèt, Mèt Berto Dorcé te gen koneksyon telefòn ak Michelet, responsab bato Miss Lily anvan ak apre bato a rive. Kidonk, DCPJ envite jij ki responsab dosye a pou l arete ansyen Minis Jistis ak Sekirite Piblik la mèt Berto Dorcé.
Dapre jounal Le Nouvelliste, envestigatè yo konvenki Mèt Berto DORCÉ, ki gen non li site kòm yon moun ki lye ak gang yo, te konnen trè byen ak ki moun zam yo ak minisyon ilegal sa yo ki te enpòte sou bato Miss Lily a te destine.
Ankèt Biwo Afè Ekonomik ak Finansye (BAFE), te transmèt nan kòmansman mwa mas 2023 a bay jij ankèt ki an chaj ka a, te revele ansyen Minis Jistis la Mèt Berto Dorcé te wè nan Primati a nan dat 8 jiyè 2022 ak direktè afè legal Ministè Jistis la, Fritz Haubourg, prensipal sispèk nan liberasyon Jonas Georges ak Fritz Jean Rélus nan ka sa a, limenm ki te oblije kouri ale nan peyi vwazen an atravè Plato Santral nan lane ki sot pase a, espesyalman nan dat ki te 15 jiyè 2022 a.
