Louis Kether Eingels se non youn nan 6 Polisye nèg ak zam asasinen yo ayè mèkredi 25 janvye 2023 a, nan komin Lyankou. Li fè pati 25yèm pwomosyon Polis Nasyonal Ayiti a.
Yon ane 2023 ki kòmanse ak dlo nan zye, plis pase 15 Polisye deja fè vwèl pou peyi san chapo. Louis Kether grandi nan zòn fontamara, depi aprè nouvèl lanmò Polisye yo fin simaye a se rèl ki genyen san rete lakay fanmi l. Manman l, frè l yo, sèl epi zanmi l yo, tout moun ki te konnen l sanse enkonsolab.
Depi kèk tan Peyi Ayiti ap travèse yon moman vrèman difisil, dlo pa janm sispann koule nan zye fanmi yo. Redaksyon Netalkole te fè yon ti pale ak gran frè viktim nan ki se Louis Junior Stanley, ak dlo nan zye li t ap reponn nou.
” Yo gaspiye frèm nan, Kether se moun tout moun, li konn moun anpil yo pa ta fèm sa. Epi m ap pwofite fè mesaj sa pase pou tout moun ki gen fanmi yo nan lapolis la, se pou nou kanpe dèyè yo. Epi responsab yo nan lapolis la k ap plede voye nèg yo al mouri a se pou bagay sa sispann. Yo mete zam nan men bandi yo, yo pa mete nan men nou y ap konte ti grenn bal ban nou epi y ap vide ba yo pa bokit pa kanntenè”.
Malgre dimansyon ensekirite a ap pran sou tout teritwa nasyonal la, jiska prezan mouche leta pa di ni monte ni desann. Alòske pitit kretyen vivan kontinye ap mouri san rete. Lapolis ki gen pou misyon pwoteje ak sèvi sanse febli nan misyon l o kontrè se yo menm k ap viktim san rete. Siw pa ta vle rele Peyi a Ayiti ou kapap rele l ” Vilaj ensekirite”.
